Ikaw ay isang talata,
Puno ka ng kahulugan.
May taglay kang lalim
Ngunit mayroon din namang paminsang babaw.
Maraming beses ko nang nakita ang iba't iba mong bersyon
Gayun din ang iba't ibang kulay ng iyong mga emosyon.
Tanggap kita
Sa ano mang kulay o mukha
Timpla o tono ng pananalita
Tanggap kita.
Iintindihin kita
Sa mga pagkakataong hindi ka lubos maunawaan
O maging sa mga panahong hindi mo nais magpaliwanag.
Pipiliin kita
Sa mga araw na ikaw mismo ay may alinlangan sa sarili
O sa mga tahimik na gabing kinakain ka ng duda.
Maging malaya ka
Huwag kang matakot maghayag gaano man kabigat
ang mga nais sambitin na salita.
Makikinig ako
Makikinig ako ng walang panghuhusga
Oo, ikaw ay isang talata
Ngunit hindi ko kailangan ng iyong mga salita upang maintindihan
Hindi mo kailangang humikbi upang ipadinig ang daing
Hindi mo kailangan ng malakas na halakhak upang ipahiwatig ang saya.
Kabisado kita.
Rinig kita sa iyong mga nakabibinging katahimikan.
Kaya kitang basahin sa pamamagitan ng pagtanaw.
Kaya kitang maramdaman kahit na may distansya.
Comments